ശില്‍പശാസ്‌ത്ര നിയമപ്രകാരം നിര്‍മ്മിച്ചതാവണം നിങ്ങളുടെ വീട്‌. കിഴക്കുനിന്നു പടിഞ്ഞാറോട്ടും തെക്കുനിന്നു വടക്കോട്ടും കാന്തിക ശക്‌തിയും വായുവും സ്വതന്ത്രമായി പ്രവഹിക്കുവാനുള്ള വാതായനങ്ങള്‍ ഉണ്ടായിരിക്കണം.
നിശ്‌ചിതമായ സ്‌ഥാനങ്ങളില്‍ പൂജാമുറി, അടുക്കള, കിണര്‍ തുടങ്ങിയവ വരണം. വീട്ടിലേക്ക്‌ കയറുന്നത്‌ ഉത്തമമായ ദിശയില്‍നിന്നുവേണം. കിഴക്കുവശത്തും വീടിന്റെ മുന്‍വശത്തും തുളസിത്തറയില്‍ തുളസി നട്ടിട്ടുണ്ടാവണം. തുളസിക്ക്‌ നിത്യേന വിളക്കുവയ്‌ക്കണം. വീട്ടുമുറ്റത്ത്‌ പൂന്തോട്ടമുണ്ടാകണം. വീടിന്‌ ചുറ്റും നിശ്‌ചിതമായ അകലത്തില്‍ വൃക്ഷങ്ങള്‍ നട്ടിട്ടുണ്ടാകണം. മലിന വസ്‌തുക്കള്‍ നീക്കം ചെയ്യാനും നശിപ്പിച്ചുകളയാനുമുള്ള സംവിധാനമുണ്ടാവണം. ഓരോന്നും അതാതിന്റെ സ്‌ഥാനത്ത്‌ സ്‌ഥാപിച്ചിരിക്കണം. ഉപകരണങ്ങള്‍ എല്ലാംതന്നെ വൃത്തിയായി സൂക്ഷിക്കണം.
വീട്‌ വൃത്തിയായിരിക്കുന്നതിന്‌ നിത്യേന വീടും പരിസരവും ചൂലുപയോഗിച്ച്‌ തൂത്തുവാരണം. വീട്ടുപരിസരം പുല്ലുപിടിച്ചാല്‍ നിത്യേന പറിച്ചുമാറ്റിക്കൊണ്ടിരിക്കണം. വീട്ടില്‍ ചിതല്‍, മാറാല എന്നിവ നീക്കാനും നിത്യേന തൂത്തുവാരാനും വൃത്തിയുള്ള തുണികൊണ്ട്‌ അഴുക്കുകള്‍ തുടച്ചുമാറ്റാനും ശ്രദ്ധിക്കണം.
വൃക്ഷങ്ങളിലെ ഉണങ്ങിയ ഓല, കൊതുമ്പ്‌, കോഞ്ഞാട്ട, ഉണങ്ങിയ തേങ്ങ, പഴുത്ത ഫലങ്ങള്‍ ഇവ സമയാസമയങ്ങളില്‍ പറിച്ചുമാറ്റണം. പഴങ്ങള്‍ ചീഞ്ഞുനശിക്കാന്‍ ഇടവരുത്തരുത്‌. വൃക്ഷങ്ങള്‍ക്കും ചെടികള്‍ക്കും നിത്യേന ജലവും മറ്റു ശുശ്രൂഷകളും നല്‍കണം. വീട്‌ വര്‍ഷത്തില്‍ ഒരിക്കലെങ്കിലും കുമ്മായമോ, പെയിന്റോ ഉപയോഗിച്ച്‌ പുതുക്കിക്കൊണ്ടിരിക്കണം. ഗൃഹത്തില്‍ നിത്യേന വിളക്കുവച്ച്‌ പ്രാര്‍ത്ഥിക്കണം. പുരയിടത്തിന്‌ ചുറ്റും വേലികെട്ടിയോ, മതില്‍ കെട്ടിയോ ചെയ്‌ത് അതിരുകള്‍ സംരക്ഷിക്കണം. പുരയിടം കാടുപിടിച്ചും വെള്ളം കെട്ടിയും ഉണക്കിലകളും ചീത്ത ഇലകളും കുമിഞ്ഞുകൂടിയുമിരിക്കരുത്‌. ഇങ്ങനെയൊക്കെ ശ്രദ്ധിച്ചാല്‍ വീട്ടില്‍ ഐശ്വര്യവും സമാധാനവും ഉണ്ടാകും.
Article Credits,Mangalam Archives
No comments:
Post a Comment